Onıñ aytqanına köre, mabüsler tahminen 1,5 saat çıqış yapıp, tahqiqat vaqtında ve davaları baqılğanda olğan bozuvlar aqqında tarif etti.
İmaye ükümniñ Rusiye Federatsiyası Ceza kodeksiniñ 205.5 maddesine istinaden (terror teşkilâtınıñ faaliyetini teşkil etüv ve böyle teşkilâtnıñ faaliyetinde iştirak etüv) çıqarılması qanunsız ola, çünki «Hizb ut-Tahrir» Rusiye qanunlarına köre, hususan teşkilâtnı terrorist olaraq tanuv qanunına köre, böyle tanılmağan edi, dep israr etti.
«Amma temyiz mahkemesi prokurornıñ er şey qanunğa uyğun ve isbatlandı degen nevbetteki delillerini qabul etip, eki mahkemeniñ qararlarını deñiştirmedi», – dep ayttı Kurbedinov.
Rostov-na-Donu Cenübiy okrugınıñ arbiy mahkemesi 2021 senesi oktâbrniñ 29-nda Bağçasaraydaki üçünci «Hizb ut-Tahrir davasınıñ» mabüslerine üküm çıqardı. Mahkeme olarnı «akimiyetni zorbalıq yolunen zapt etüv ıntıluvında» ve «terror teşkilâtında iştirak etüvde» qabaatlı tanıp, mabüslerni sert rejimli koloniyağa almağa qarar berdi. Bu aqta mahkemeden soñ mahküm etilgen qırımlılarnıñ advokatları bildirdi.
Advokat Edem Semedlâyevniñ malümatına köre, Seytumer Seytumerov 17 yıl sert rejimli koloniyada qalmasına, Osman Seytumerov 14 yıl, Amet Suleymanov 12 yıl, Rustem Seytmemetov 13 yılğa üküm etildi. Advokatnıñ bildirgenine köre, mabüsler başta 3 yıl ve 6 ay apishanede yatmalı.
«Memorial» aq qorçalayıcı merkezi Bağçasaraydaki «Hizb ut-Tahrir davasınıñ» mabüsleri Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
