Apis cezasına mahküm etilgen "Hizb ut-Tahrir" davasınıñ 60 yaşındaki mabüsi Enver Ömerov "Vladirmirskiy tsentral"ğa etap etildi. Bunı "Qırım birdemligi" cemaat birleşmesine advokat Emil Kurbedinov haber etti.
"Rostov-na-Donu bölgesiniñ arbiy mahkemesinde Enver Ömerovnı diger qırımtatar Azamat Eyupovnıñ davası üzre şaat olaraq video bağ vastası ile sorğuğa çektiler. Omerov tasdıqladı ki, Eyupov FSB hadimleri iddi etkeni kibi iç bir vaqıt onıñ evinde olmağan, demek ki onıñ sesi mahsus hızmetlerniñ audio yazılarında olma bilmez. Bunda ğayrı Enver Ömerov evel mudafaa tarafı bildirgeni kibi sesniñ aslında Rustem Mirpoçoyevniñ olğanına diqqa etti", - dep yazıla bildirmede.
Qayd etilgeni kibi, Kurbedinovğa Ömerov ile laf etmek içün ilâve vaqıt bermegenler.
"O suallerge cevap berdi ve emin edi. Bir baqıştan sağlığı bir qarar kibi körüne. Bir şeyi olsa edi, bellesem, haber aytır edi", - dedi advokat.
"Qırım birdemligi"nde qayd etkenleri kibi. bu diñlevlerde Ömerov uzun etap protsedurasından soñ ilk defa ortağa çıqqan. Bu dava boyunca qabaatlanğan diger mabüsler artıq Rusiyeniñ çeşit cezahanelerindeler.
2019 senesi iyünniñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Omerov, Ayder Cepparov ve Eskender Suleymanov.
Rostov-na-Donu Cenübiy okrugınıñ arbiy mahkemesinde 2021 senesi iyünniñ 10-nda Aluştadaki «Hizb ut-Tahrir davası» oturışuvında taraflarnıñ munaqaşaları vaqtında Rusiye prokurorı mahküm etilgen qırımlılar içün 14 yıldan 19 yılğa qadar sert rejimli koloniyada qalmalarını istedi
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
