Bağçasaraydaki ekinci «Hizb ut-Tahrir davasınıñ» mabüsleri sıñırlav tedbiriniñ uzatıluvına qarşı berilgen istinaf arizası baqılğanda penceresi ve avalandıruvı olmağan 3 metr kârelik odada qaldı. «Qırım birdemligi» cemaat teşkilâtı advokatlarnıñ izaatları ile videonı Qırım.Aqiqatqa berdi.
Advokat Siyar Paniçniñ aytqanına köre, oturışuv Moskva vilâyetiniñ Vlasiha şeerindeki İstinaf arbiy mahkemesinde oldı, qırımlılar ise Rusiyeniñ Rostov-na-Donu SİZOsından video konferentsiya vastasınen iştirak etti.
«12 saat mahkemede edik. Böyle bir şey daa körmegen edim, imayeciler mahkemede iştirak etmeleri içün kerekli şaraitler olmasını bir qaç saat devamında talap etti. Bir qarar skemle berilsin, uyğun bir yer berilsin, dep talap etkenler. Bu oda 3 metr kârelik edi, avalandıruvsız, penceresiz odada sekiz kişi bar edi, bir skemle ve bir stul – üç yer. Uyğun tutuvnı temin etmek talaplarımızğa mahkeme er şey qanunğa uya, tahqiqat izolâtorı qabaatlı dep, bir şeyge tesir etip olamağanlarını bildirdi», – dedi advokat Edem Semedlâyev.
Onıñ aytqanına köre, müvekiller yaramadı, yerde yattı.
«Feldşer qan basımlarını baqtı, yüksek olsa da, mahkemede iştirak ete bileler, dep aytqan edi», – dep qoştı advokat.
Qayd etilgenine köre, mahkeme oturışuvnı iyünniñ 8-ne qaldırdı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
