Bağçasaraydaki ekinci «Hizb ut-Tahrir davasınıñ» mabüsi Server Mustafayevniñ sağlıq vaziyeti fenalaşa, dep bildire Ukraina Yuqarı Radasınıñ insan aqları vekâletlisi Lüdmila Denisova.
Onıñ aytqanına köre, martnıñ 19-ndan berli Mustafayevniñ sıcağı köterile ve öksürigi bar, faqat Qırımnıñ Rusiye akimiyeti oña kerekli tibbiy yardım köstermey.
«Server Mustafayevniñ sağlıq vaziyeti fenalaştı – sıcağı 37,6-dan 39,3 derecege köterildi, quru öksürigi bar, başı pek ağıra ve bedeni taqatsız qaldı. O, Rusiyeniñ Cenübiy okrugınıñ arbiy mahkemesine ve penitentsiar müessisesiniñ memuriyetine muracaat etip, kerekli tibbiy yardım kösterilmesi aqqında rica etti, lâkin oña tek sıcaq tüşürici ine uruldı, bir talil yapılmadı ve diagnozı qoyulmadı», – dep yazdı ombudsmen Facebook saifesinde.
Onıñ aytqanına köre, Rusiye akimiyetiniñ bu areketleri insannıñ ayat aqqını kefil etken İnsan aqları ve esas serbestligi şartnamesini boza.
Denisova, Rusiyeniñ insan aqları vekâletlisi Tatyana Moskalkovanı Mustafayevniñ yuqunç zeerlenüvini, hususan koronavirus yuqunçını red etmek içün tibbiy tedqiqini yaptırmasına çağırdı.
Daa evel berilgen malümatqa köre, Server Mustafayev Rusiyeniñ Rostov-na-Donu Cenübiy okrugınıñ arbiy mahkemesiniñ oturışuvına yüksek sıcaq ve öksüriknen ketirildi. Advokat Aleksey Ladinniñ aytqanına köre, qırımlı esnas başlanmasını yatıp bekledi.
Ukraina Yuqarı Radasınıñ insan aqları vekâletlisi Lüdmila Denisovanıñ bildirgenine köre, Mustafayev tibbiy yardım kösterilmesi ve koronavirus taliliniñ yapılması aqqında rica ete.
Amnesty International halqara aq qorçalayıcı teşkilâtı, Rusiyeniñ Cenübiy arbiy okrugınıñ arbiy prokurorı Sergey Kolomiyetske mektüp yazıp, Server Mustafayevge tibbiy yardım kösterilüvi, bütün qabaatlavlarnıñ lâğu etilüvi ve onıñ azat etilüvi aqqında rica etmege çağırdı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
