Bağçasaraydaki üçünci «Hizb ut-Tahrir davasınıñ» mabüsleri Seyran Hayretdinov ve Alim Sufyanov COVID-19 hastaları qayd etilgen Aqmescitniñ №1 psihonevrologik hastahanesinde mecburiy psihiatrik ekspertizasında buluna. Sufyanov karantin odasında tutula, dep bildirdi «Qırım aq qorçalayıcı gruppası» advokat Lilâ Gemeciniñ malümatına esaslanıp.
Aq qorçalayıcılarnıñ malümatına köre, keçken afta advokat eki qırımlınen körüşmege tırıştı, lâkin, onıñ aytqanına köre, oña tek Hayretdinov kösterildi, çünki Sufyanov sıcağı sebebinden karantin odasında yata.
«Sufyanovnıñ yañı koronavirus yuqunçı barmı advokatqa aytmadılar», – dep bildire «Qırım aq qorçalayıcı gruppası».
Aqmescitniñ №1 psihonevrologik hastahanesinde COVID-19 hastaları çoq olğanı içün gospital açıldı, dep bildirdi Qırım ve Aqyardaki Rospotrebnadzor idaresiniñ yolbaşçısı Natalya Penkovskaya.
Penkovskaya, hastalıq «tibbiyet hadimleriniñ muqaytsız olması» sebebinden tarqaldı, dep ayttı. Onıñ qayd etkenine köre, epidemiologik tahqiqat devam ete.
Umumen pandemiya vaqtında, yerli akimiyetniñ malümatına köre, 8784 COVID-19 hastası qayd etildi. 3566 insan tibbiy müessiselerde tedaviylene, 4998 kişi tüzelgen soñ çıqarıldı. Qırımnıñ Rusiye Sağlıq nazirligi bildirgenine köre, 123 hasta koronavirustan vefat etti.
Aqyarda yılnıñ başından 2164 kişi koronavirus yuqunçına oğradı. Al-azırda 1373 kişi tüzeldi, 61 insan vefat etti, dep bildire yerli sakinler.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
