Bağçasaraydaki birinci «Hizb ut-Tahrir davasınıñ» mabüsi Enver Mamutov ve Bağçasaraydaki ekinci «Hizb ut-Tahrir davasınıñ» mabüsi Ernes Ametov apishanede mahsus blokqa avuştırıldı.
Bu aqta noyabrniñ 25-nde keçirilgen «Qırım birdemligi» cemaat teşebbüsiniñ toplaşuvında advokat Emil Kürbedinov bildirdi, dep haber ete Qırım.Aqiqat mühbiri.
«Enver mahsus blokqa avuştırıldı: eki insanlıq kamera, gece-kündüz video vastasınen seni nezaret eteler. Qorqunç şaraitler: dımlılıq, çürügen divarlar, antisanitariya er yerde», – dep qayd etti advokat.
Bağçasaraydaki ekinci «Hizb ut-Tahrir davasınıñ» mabüsi Ernes Ametov, advokatnıñ aytqanına köre, Aqmescitteki nezarethaneniñ mahsus blokunda bir aydan berli buluna. Advokatı Ayder Azamatovnıñ bildirgenine köre, Erneske böyle qararnıñ sebebi aytılmağan edi.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
2018 senesi mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı «Hizb ut-Tahrir işinen» birleştirildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
