Uzun zamandır SİZOda bulunğan Bağçasaraydaki ekinci «Hizb ut-Tahrir davası» mabüsleriniñ közleri zayıfladı. Bu aqta advokat Lilâ Gemeci Qırım.Aqiqat mühbirine tarif etti.
Advokatnıñ qayd etkenine köre, Timur İbragimov, Server Mustafayev ve Edem Smailovnıñ közleri yaramay köre, imayeciniñ aytqanına köre, «yatqan kameralarında baqışlarını fokuslandırmağa qıyın ola».
«Kün ışığınıñ olmaması, kameralardaki pek tonuq ışıq – vaziyetni daa beter ete. Közleri zayıflay», – dedi Lilâ Gemeci.
Rostov-na-Donu Cenübiy okrugınıñ arbiy mahkemesinde fevralniñ 17-nde Rusiye prokuraturası Bağçasaraydaki ekinci «Hizb ut-Tahrir davası» boyunca ekspertizalarnı seslendirip başladı.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
