Bağçasaraydaki ekinci "Hizb ut-Tahrir davasınıñ" faali Server Zekeryayev "Zonatelekom" vastasınen ailesinen bağlanğan ve Tula vilâyetiniñ Donskoy şeerindeki 1-nci tüzetüv cezahanesine etap ettilgenini bildirgen. Bunı "Qırım birdemligi" cemaat birleşmesi ömür arqadaşı Zarema Zekiryayevağa atfı etip bildirdi.
"Aqayım telefon etip, olarnı Seyran Saliyev ile beraber Ufadan Râzan tarafına alıp çıqarğanlarını bildirdi. Soñra olar Tulada bulunğanlar, andan olarnı Yaroslavlge alıp ketkenler, ğaliba anda 1,5 kün bulundılar. Bir qaç kün anda oturğan soñ olarnı kene Tulağa alıp ketkenler. Anda 2-nci tüzetüv cezahanesine yerleştirgenler. Soñra olarnı ayrı yerleştirgenler. Sreverni 1-nci tüzetüv cezahanesine. Şimdi o karantindedir. Urba bergenler. Onı pek çoq vaqıt bir yerden başqa yerge taşıdılar, etap em maneviy, em ruhiy ceetten qıyın esnastır", - dedi Zarema Zekeryayeva.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatladı.
Rusiyeniñ Rostov-na-Donu şeerindeki Cenübiy okrugınıñ arbiy mahkemesi 2020 senesi sentâbrniñ 16-nda Bağçasaraydaki ekinci «Hizb ut-Tahrir davası» boyunca üküm çıqardı. Marlen Asanov 19 yıl sert rejimli koloniyada, Memet Belâlov 18 yıl sert rejimli koloniyada, Timur İbragimov 17 yıl sert rejimli koloniyada, Seyran Saliyev16 yıl sert rejimli koloniyada qalmasına mahküm etildi. Ernes Ametov qabaatsız tanılıp, mahkemede azat etildi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
