Aprelniñ 29-nda advokat Ayzat İşimgulov Rusiyedeki Salavata şeerniñ 16-nci tüzetüv cezahanesinde tutulğan Aqmescit «Hizb ut-Tahrir davasınıñ» mabüsi Emil Cemadenovnı yoqladı. Bunı mayısnıñ 8-nde «Qırım birdemligi» cemaat birleşmesi haber etti.
İşimgulov siyasiy mabüsniñ apayı Liana Belâlovağa atfı etip, Cemadenov ceza izolâtorında aprelniñ 22-nden berli tutulğanını bildirdi.
Advokatnıñ sözlerine köre, apis etilgen Cemadenovnıñ sağlığınen bağlı problemleri bar – boğazı ve qolunda ağrı bar, şunıñ içün ağrısızlandırıcı ine urğanlar. Siyasiy mabüsniñ özü sağlığınıñ zayıflaşması suvuq oda sebebinden olğanını tüşüne.
Tüzetüv cezahanesinde Cemadenov Quran ve ruhset etilgen diniy edebiyatnı oquy.
«Kamerada qaranlıq, pek qıyın, amma oqup olam», – advokat qırımtatarnıñ aytqanlarından alıntı ketire.
Ayzat İşimgulov, Cemadenov ceza izolâtorında aman-aman bütün Ramanzan ayını ve umumen 160 keçirgenini ayttı.
«Yazıq ki, amma bayram künlerini de anda keçirecek. Dünya musulmanları muqaddes bayramlarımızdan birini qayd etkende, ballarımız ceza izolâtorlarında buluna. Bu iskenceler, başqa türlü buña ne demek daa mümkün. 24 saat devamında kamera nezareti altında dımlı ve suvuq divar ve taban. Ballarnıñ metinli mevamını, qaviy imanını ve küçlü ruhunı körip, olarnı yıqacaq olalar», – «Qırım birdemligi» Liana Belâlovanıñ aytqanlarından alıntı ketire.
Aqmescit «Hizb ut-Tahrir davasınıñ» mabüsi Teymur Abdullayevniñ ceza izolâtorında qaluv müddeti iyunniñ 6-na qadar uzatıldı.
Uzeir Abdullayev 12 yıl ve 6 ay, Rustem İsmailov 13 yıl ve 6 ay, Emil Cemadenov11 yıl ve 6 ay, Ayder Saledinov 11 yıl ve 6 ay apis cezasını aldı. Teymur Abdullayevniñükmü ğayrıdan baqılğan soñ, onı 16 yıl ve 6 ayğa üküm ettiler, onıñ içün 1 yıl ve 4 ay müddetinen memuriy nezaret belgilendi.
2019 senesi iyün ayında Rostov-na-Donunıñ Cenübiy okrugınıñ arbiy mahkemesi bu dava mabüsleri Teymur Abdullayevni 17 yılğa, Uzeir Abdullayevni 13 yılğa, Rustem İsmailovnı 14 yılğa, Ayder Saledinov ve Emil Cemadenovnı 12 yılğa üküm etti.
Ukraina Tış işler nazirligi bu davağa qarşı narazılıq bildirip, Rusiyege qarşı sanktsiyalarnı quvetleştirmege çağırğan edi.
«Memorial» aq qorçalayıcı merkezi bu davanıñ bütün mabüslerini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
