Bağçasaray “Hizb ut-Tahrir davası”nıñ iştirakçisi Seyran Saliyevge bir yarım yıl içindeilk sefer qadını ve beş yaşındaki qızınen körüşmege razılıq berdiler. Bu aqta “Qırım birdemligi” cemiyet birleşmesi Facebookta haber etti.
Bir yarım yıl devamında Mümine Saliyevanen aqayınen körüşmek muracaatları red etile edi. Bir qaç kün evel Müminege tahqiqatçı imzalağan körüşüv razılığını berdiler.
“Körüşüv eki saatqa yaqın edi. Allahqa şükür, aqayım özüni yahşı duya. Elbette, onı bir şey raatsızlasa bile, o bir vaqıt aytmaz. İste, öyldir o. Ammaruh küçü, sabırı, sebatından ğayrı, sıfatına köre, o tendürist ve sağlam. Bütün halqımızğa teşekkürlerini ve dualarını aytmağa, dedi. Soñunda: “Ğalebe yaqın”, dep ayttı”, - dep aytıp berdi siyasiy mabüsniñ apayı.
Kreml nezaretindeki Qırım Yuqarı Şurası matrnıñ 6-sında Bağçasaray “Hizb ut-Tahrir davası”nıñ dört iştirakçisi - Marlen Asanov, Seyran Saliyev, Ernes Ametov ve Memet Belâlovnıñ tevqif müddetini uzattı.
2017 senesi oktâbrniñ 12-nde Rusiye telükesizlik hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
