İşğal altındaki Qırımda siyasiy mabüsler Arsen Abhairov ve Rustem Emiruseinovnıñ anaları Zeliha ve Zure polis hadimine kelmek talabınen celpnamelerni aldı, dep haber ete «Qırım birdemligi» cemaat birleşmesi.
Celpnamelerge köre, qadınlar Qurman rayonınıñ Büyük Onlar qasabasınıñ №3 Rusiye İç işler nazirligi bölügine kelmeli. Qayd etilgenine köre, siyasiy mabüslerniñ anaları imaye hızmetlerinden faydalana ve kelmege mecbur.
Advokat Lilâ Gemeciniñ fikirince, siyasiy mabüslerniñ analarına qarşı davalar balalarınıñ aqlarını qoruvında faalligini eksiltmek, adaletsizliknen razı olmağa mecbur etmek ve «başqalarnı qorquzmaq» içün açıla.
Advokat, bir kişilik narazılıq aktsiyasını keçirmek içün icra akimiyet organlarına haber etip izin almağa kerekmey.
«Uzun vaqıttan berli ekili standartlarnı köremiz. Karantin başlağan soñ bir sıra resmiy tedbir kütleviy ola, mesafege riayet etilmey, amma memuriy mesüliyetke çekilgenler yoq – bir kişilik narazılıqlarğa çıqqanlar ise cezalandırıla», – dep bildire Lilâ Gemeciniñ aytqanlarını cemaatçılar.
2020 senesi noyabr ayında belli organına köre, Qurmandaki «Hizb ut-Tahrir davasınıñ» mabüsi Arsen Abhairovnıñ anası Zeliha Abhairovağa qarşı memuriy dava açıldı ve Rusiye Memuriy bozuv kodeksiniñ 20.2 maddesiniñ 5-nci qısmına istinaden bozuv alâmetleri boyunca memuriy tahqiqat keçirile. Aynı qarar bir kişilik narazılıq aktsiyasınıñ diger iştirakçisi Zure Emiruseinovağa qarşı da çıqarıldı.
Oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqtı.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
Hizb ut-Tahrir davası
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
