Rusiye uquq qoruyıcıları tarafından tutulıp, Rusiyede yasaqlanğan «Hizb ut-Tahrir» teşkilâtında iştirak etkeninden şübheli sayılğan Büyük Onlar qasabasınıñ sakini Eskender Abdulganiyevniñ anasına oğlunı körmege izin berilmedi. Bunı aprelniñ 9-nda «Qırım birdemligi» cemaat birleşmesi Facebookta haber ete.
Rusiye tahqiqatçısınıñ aytqanına köre, körüşüvde «malümat berilmesi mümkün».
«Qabaatlanğan Abdulganiyev E. birinen körüşse, yaqın soylarına ileride diger şahıslarğa belli ola bilecek malümat bere bile, olarğa nisbeten ise tahqiqat ve diger tedbirler alına bile, belki», – dep aytıla Rusiye FSBsiniñ Tahqiqat bölügi vesiqasında. Onı tutulğannıñ anası Emine Abdulganiyeva derc etti.
Emine Abdulganiyeva mart ayında da oğlunı körip olamağanda aynı vesiqa alğan edi.
Fevralniñ 14-nde Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emirüseinov alındı. Fevralniñ 15-nde Kreml kontrolindeki Kiyey rayon mahkemesi olarnı tevqif etti.
Fevralniñ 15-nde Kreml kontrolindeki Kiyev rayon mahkemesi olarnı tevqif etti.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
