Bağçasaraydaki «Hizb ut-Tahrir davasınıñ» mabüsi Server Zekiryayevniñ şişik şübhesi bar, vaziyet kritik ola bile. Bu aqta advokat Aleksey Ladin «Qırım birdemligi» cemaat birleşmesine haber etti.
«Server Zekiryayevniñ sağlıq problemleri bar ve hirurgğa baqıtırılmasını uzun zamandır talap etemiz, ariza, şikâyetler berdik. Ekim baqıp, yaman ya da yahşı tabiatlı şişik olğanını añlamaq içün UZİ yapılmalı, dedi. Bunı ayttı ve oldı, bir aftadan berli bir areket yoq. Vaziyet kritik ola bile, saat ve künler müim ola bile. Şunıñ içün müvekkilimniñ tibbiy yardım aqqı yerine ketirilsin dep, SİZOnıñ tibbiy bölügi adına şahsiy qarar çıqarılması aqqında muracaat berem», – dep bildirdi Ladin.
Berilgen malümatqa köre, yanvarniñ 27-nde Bağçasaraydaki «Hizb ut-Tahrir davasınıñ» mahkeme oturışuvında Zekiryayev SİZOnıñ tibbiy bölügini oña tibbiy yardım köstermek içün bir şey yapmay, dep bildirdi.
Noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqmağa başladı.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
