Ukraina Yuqarı Radasınıñ İnsan aqları vekâletlisi Lüdmila Denisova, ekinci Bağçasaray "Hizb ut-Tahrir davası"nen bağlı Rusiyede sentâbr 7-sinde mahkeme oturışı olacağını hatırlattı. Qabaatlav tarafı bu davanıñ iştirakçileri içün 15-ten 21 yıllıq qadar apis cezasını istey. Ombudsmen halqara topluluqnı qırımlılarğa bu ükümlerniñ bermege razı olmamağa çağırta.
"Men halqara insan aqları teşkilâtlarınıñ ve diplomatik korpuslarnıñ vekillerini vatandaşlarınıznıñ mahkeme oturışlarında bulunmaq ve olarnıñ adaletli mahkemege aqlarını yerine ketirmege çağırtam", - yazdı Denisova Facebookta.
Rusiye prokuraturası bu davanıñ bütün iştirakçileri içün apis cezasını istedi: Marlen Asanovğa - 20 yıl ve 800 biñ rublelik cöreme, Memet Belâlovğa - 21 yıl, Timur İbragimovğa - 20 yıl. Olarnıñ "Hizb ut-Tahrir" teşkilâtınıñ bölüginiñ teşkilcileri kibi köreler.
Davanıñ qalğan iştirakçilerine böyle ceza isteyler: Server Zekiryayev - 15 yıl, Server Mustafayev - 17 yıl, Seyran Saliyev - 19 yıl, Ernes Ametov - 17 yıl ve 6 ay, Edem Smailov - 17 yıl ve 6 ay.
2017 senesi oktâbr ayında Rusiye telükesizlik hısmetiniñ hadimleri Bağçasaraynıñ altı sakini Timur İbragimov, Marlen Asanov, Memet Belâlov, Seyran Saliyev, Server Zekiryayev ve Ernes Ametovnı tutup alan edi. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
2019 senesi noyabrniñ 15-nde Rusiyeniñ Rostov-na-Donu Cenübiy okrugınıñ arbiy mahkemesi Bağçasaraydaki ekinci «Hizb ut-Tahrir davasınıñ» temelini baqıp başladı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
