Aqmescitteki «Hizb ut-Tahrir davasınıñ» eki mabüsi Uzeir ve Teymur Abdullayevlerniñ anası Dilâra Abdullayevanıñ fikirince, oğullarınıñ qabaatlavı Rusiye rejiminiñ devlet cinayeti ola.
«Tek eki oğlum bar, ekisi de tutuldı ve SİZOda nezaret altında buluna. Repressiyalarnıñ qurbanı oldılar. Rejim terrorizm ile küreşkenini bildirip, regionnı farqlı tüşüngen, küçlü, boysunmağan insanlardan temizley, olarğa terrorist dep ayta», – dep ayttı o, Qırım.Aqiqatqa.
Onıñ aytqanına köre, Uzeir ve Teymur Abdullayevler iç bir vaqıt qanunnı bozmadı ve cinayet işlemediler.
«Bu devlet cinayeti, qanunsızlıq. Şeref ve itibar ayatını saylağan qabaatsız oğullarımız apiske alındı. Advokatlar bir şey yapıp olamasa, mahkemelerge basqı yapılsa, prokuratura, taqiqat ve mahkemeler bir olsa, olarnıñ qabaatsız olğanını nasıl isbatlamaq mümkün?», – dedi o.
Rostov-na-Donudaki Şimaliy-Kavkaz okrugınıñ arbiy mahkemesi sentâbrniñ 5-nde keçken ilk oturışuvında Aqmescitteki «Hizb ut-Tahrir işinen» bağlı materiallarnı ilâve tahqiqat yapılmaq kerekligi sebebinden prokuraturağa keri qaytardı.
Qabaatlanğan beş kişi Rustem İsmailov, Ayder Saledinov, Emil Cemadinov, Uzeir ve Teymur Abdullayevniñ tevqifi üç ayğa uzatılğan edi. Olar yanvarniñ 11-ne qadar SİZOda qalacaq.
Daa evel avgustnıñ 21-nde Rıstov-na-Dobıuda aynı mahkeme Yaltadaki «Hizb ut-Tahrir işinen» bağlı materiallarnı da Qırım prokuraturasına keri qaytarmağa qarar bergen edi.
2016 senesi oktâbrniñ 12-nde Qırımda beş musulman qorantasında tintüvler yapıldı. Neticede, Rusiye ve o ilhaq etken Qırımda yasaqlanğan «Hizb ut-Tahrir» teşkilâtında iştirak etkenlerinde qabaatlanğan beş qırımtatar: Rustem İsmailov, Uzeir Abdullayev, Teymur Abdullayev, Emil Cemadenov ve Ayder Saledinov tevqif etildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
