Mayısnıñ 19-nda Rusiyeniñ Cenübiy bölgesiniñ arbiy mahkemesinde ekinci Aqmescit «Hizb ut-Tahrir davası» boyunca oturışında, mahkemelengenlerden biri Raim Ayvazovnıñ evel iskenceler ile qabaatlağan FSB operativcisi Rinat Valiulin sorğuğa çekildi. Bunı «Qırım birdemligi» cemaat birleşmesi haber etti.
«Yañı bir şey şaat aytmadı, qabaatlav hulâsasından ezberlengen laflarnı tekrar-tekrar ayttı, mahkemelengenlerniñ terroristik faaliyeti aqqındaki suallerge bölük azaları olğanı ve ekspertizağa atfı etip cevap berdi. Sorğu bir saattan az devam etti», – aytıp berdiler «Qırım birdemliginde».
Rinat Valiulinniñ mahkeme oturışı aqqında açıq tefsirleri yoq.
Bundan ğayrı, mahkemede mahkemelengenlerden biri Vladlen Abdulkadırov keçken oturışta ilân etilgen isbatlarnı tenqit etken.
Nevbetteki mahkeme oturı iyunniñ 2-nde olacaq.
Evel, ekinci Aqmescit «Hizb ut-Tahrir davasınıñ» mabüsi Raim Ayvazov mahkemede, Rusiye FSB hadiminiñ tehdidi ve iskenceleri altında dava boyunca diger mabüsler aqqında yalan atqanını bildirdi.
Hatırlatamız, FSB Aqmescitteki «Hizb ut-Tahrir davasınıñ» mabüslerini beş gruppağa böldi.
«Memorial» aq qorçalayıcı merkezi dava mabüslerini siyasiy mabüs dep tanıdı.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen 24 faal Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi. Edem Yayaçikov – ğayıp oldı, onıñ bulunğan yeri martnıñ 27-nden berli belli degil. Soñra daa bir şübheli Raim Ayvazov tutuldı.
