Rostov-na-Donu Cenübiy okrugınıñ arbiy mahkemesinde Bağçasaraydaki «Hizb ut-Tahrir davası» boyunca tahqiqat tedbirlerinde iştirak etken üç şaat sorğuğa çekildi.
Bu aqta «Qırım birdemligi» cemaat birleşmesi advokat Nazim Şeyhmambetovnıñ malümatına esaslanıp bildire.
«Sorğuda şaatlar tahqiqat tedbirlerinde iştirak etken statistler apiske alınğan qırımtatarlardan farqlı edi, imaye bunı ciddiy bir bozuv dep saya. Bazı statistlerniñ yaşı mabüslerden bayağı farqlı edi, aralarında 10-15 yaş bar edi, bu qıyaslav içün bir sebep ola bile», – dep aytıla haberde.
Qayd etilgenine köre, advokatlar bir sıra muracaat berdi, hususan böyle cinaiy davalarda olğan ve sesi bir çoq davanıñ ses qaydlarında olğan Letoniya vatandaşı Konstantin Tumareviçni sorğuğa çekmege çağırdı. İmayeniñ malümatına köre, bu insan şaatlıq ete bile, lâkin mahkeme mezkür muracaatnı qanaatlendirmedi. İmaye tarafı mahkeme-ekspert bürosınıñ mütehassısları yapqan fonografik ekspertizanıñ hulâsasını incelep başladı. Diñlevler bunıñnen yekünlendi.
Nevbetteki oturışuv oktâbrniñ 14-15-nde saat 10:00-da olacaq.
Hatırlatamız, «Memorial» aq qorçalayıcı merkezi Bağçasaraydaki üçünci «Hizb ut-Tahrir davasınıñ» mabüsleri olğan dört qırımlı Seytumer Seytumerov, Osman Seytumerov, Amet Suleymanov ve Rustem Seytmemetovnı siyasiy mabüs dep tanıdı.
2020 senesi martnıñ 11-nde Bağçasarayda bir qaç qırımtatarınıñ evi tintildi: Enver Mustafayev, Amet Suleymanov, ağa-qardaş Seytumer ve Osman Seytumerovlar ve emceleri Rustem Seytmemetovnıñ. Tintüv «Qırım birdemliginiñ» sabıq faali Seytumer Seytumerovnıñ evinde de keçirildi. O, bir qaç yıl evelsi Qırımnı terk etti.
Enver Mustafayev sorğudan soñ yiberildi. Seytumer Seytumerov (d.s. 1988), Amet Suleymanov (d.s. 1984), Rustem Seytmemetov (d.s. 1973), Osman Seytumerov (d.s. 1992) Rusiye Ceza kodeksiniñ 205.5 maddesiniñ ekinci qısmına istinaden (Terror teşkilâtınıñ faaliyetini teşkil etüv ve bu teşkilâtnıñ faaliyetinde iştirak etüv) qabaatlana. 2018 senesinden berli Qırımda olmağan Seytumer Seytumerov Rusiye Ceza kodeksiniñ 205.5 maddesiniñ birinci qısmına istinaden qabaatlana.
Qırım Muhtar Cumhuriyeti ve Aqyar prokuraturası martnıñ 11-nde Bağçasarayda ve Bağçasaray rayonında Rusiye quvetçileri keçirgen tintüvlerden sebep cinaiy tahqiqat başlattı. Daa soñra müessise daa bir cinaiy tahqiqat başlatılğanını bildirdi – o, tintüvlerden soñ qırımtatarlarnıñ tutuluvınen bağlıdır.
Ukraina Tış işler nazirligi, martnıñ 11-nde olıp keçken tintüvlerge qarşı narazılıq bildirdi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
