Avgustnıñ 20-sinde Rostov-na-Donu şeerinde Şimaliy Kavkaz arbiy mahkemesinde prokuror, Hizb ut-Tahrir azalığında qabaatlanğan Enver Seytosmanovnıñ davası boyunca delillerni kösterip başladı. Bunı Qırım.Aqiqat mühbiri bildire.
Advokat Emil Kurtbedinov aytqanına köre, tahqiqat onıñ müşterisini "Hizb ut-Tahrir"niñ Aqyar bölüginiñ ekinci teşkilcisi, dep saya. Yani bu dava boyunca evel mahkemelengen Ruslan Zeytullayevnen bir sırada.
"Tahqiqat, Seytosmanov, evel mahkemelengen Ruslan Zeytullayevnen beraberlikte "Hizb ut-Tahrir"niñ Aqyar bölüginiñ teşkilcisi ola, dep tasdıqlamağa tırışa. Atta Seytosmanovnıñ davasına Aqyar "Hizb ut-Tahrir davası"nıñ vesiqaları qoşuldı", - dep aytıp berdi advokat.
Mahkeme oturışınıñ başında gizli şaat ve Enver Seytosmanov arasında olğan sübetniñ gizli-qapalı yazılğan audiosınıñ stenogrammasını oqıp başladılar.
"Eñ müim delil - bu audio, nasıldır bir arap adamınıñ yazğanı. Söz sırası, o, birinci Aqyar davası boyunca mahkemelengenlernen de sübetlerni gizli yazıp qoyğan edi. Bu şaat Seytosmanovğa "Huzb ut-Tahrir" aqqında provokatsion suallerni bere edi ve er şeyni gizli audioğa yazdı. Bu yazılarnı ekspertlerge berdiler ve olar, elbette ki, olarnı "Hizb ut-Tahrir" azalarınıñ gizli körüşüvleri, dep saydı, Seytosmanovnı ise bölük teşkilcisi dep", - añlattı Kurbedinov.
Avgustnıñ başında Şimaliy Kavkaz arbiy mahkemesinde, iştirakçisi Enver Seytosmanov olğan, Aqyar "Hizb ut-Tahrir davası"nıñ birinci oturışı keçirildi.
İyülniñ başında Rostov-na-Donu mahkemesi, video alâqasınen Seytosmanovnıñ tevqif müddetini dekabrniñ 20-sine qadar uzattı.
İyülniñ soñunda ise Enver Seytosmanovnı Aqmescit SİZOsından Rostov-na-Donu şeeriniñ SİZOsına etep ettiler.
Rusiye quvetçileri, ağa-qardaş Ernes ve Enver Seytosmanovlarnı 2018 yılı mayıs 10-unda Aqyarnıñ Balıqlava rayonınıñ Hayto (Tılovoye) köyünde, tintüvlerden soñ tutıp aldılar.
Ernesni soñra yiberdiler, Enverge ise cinaiy dava açılğanı aqqında qarar berildi.
