Hersonda Rusiyeniñ idare etilgen ava bombasınıñ darbesi neticesinde on qatlı binada altı insan yaralandı, dep bildirdi vilâyetniñ arbiy memuriyet yolbaşçısı Aleksandr Prokudin.
«Ekizler – 14 yaşında oğlançıq ve qızçıq hastahanede bulunalar. Ekimler allarını bir qarar olaraq ayta. Darbe yerine yaqın maşina turağınıñ nevbetçisi odasında bulunğan 47 yaşında erkek de hastahanege alındı. O, cam yaralarını aldı ve ayağınıñ kemigi sındı. Daa üç erkekke acele yardım adise yerinde yardım etti. Yaralanğanlarnıñ kontuziyası bar, hersonlılardan biriniñ başı yaralandı», – dep bildirdi vilâyetniñ arbiy memuriyet yolbaşçısı.
Onıñ aytqanına köre, darbe neticesinde 15 daire yıqıldı – birinci qattan onuncı qatqa qadar. Bundan ğayrı, 80 evniñ camları qırıldı.
«Yıqıntılar altında daa insanlar ola bile. Şimdi açıp, yaralanğanlarnı qıdıralar», – dep qayd etti Prokudin.
Rusiye arbiyleri Ukrayina regionlarına çeşit silâlarnen muntazam sürette ücüm ete.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına maqsatlı darbelerini endirgenini red ete, sakinlerni öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
