Oktâbrniñ 1-nden 2-ne qadar Rusiyeniñ Hersonğa qarşı açqan ateşi vaqtında Svâto-Duhovskıy kafedral kilsesi ve Herson yeparhiyasınıñ yeparhial idaresi zarar körgenler, dep bildirdi oktâbrniñ 2-nde saba Ukrayına pravoslav kilsesiniñ Herson yeparhiyasınıñ matbuat hızmeti.
«Snarâd yeparhial idareniñ mağazına, kilse alanına tüşti, neticede merkeziy kiriş, fasad ve yardımcı binalar zarar kördi, pencere camları qırıldı», – dep aytıla haberde.
Herson vilâyetiniñ arbiy memuriyet yolbaşçısı Oleksandr Prokudinniñ malümatına köre, keçken künü Rusiye Federatsiyasınıñ quvetleri mayın atıcı, top, «Grad», tank, uçucısızlardan 71 kere ateş açtı, tek Hersonğa 20 snarâd atıldı.
«Rusiye arbiyleri vilâyetniñ mesken yerleriniñ kvartallarına ücüm etti; Herson rayonında zavod ve traktor brigadası; tükân, oquv yurtu ve tibbiy müessise, Berislav rayonında infrastruktura obyekti zarar kördi. Rusiye istilâsı neticesinde bir kişi elâk oldı, daa altı insan yaralandı, ekisi – bala», – dep aytıla haberde.
Rusiye arbiyleri raketa, uçucısızları, topları yetken Ukrayina şeerlerine muntazam sürette ateş aça. Delillerge baqmadan, Rusiye vatandaş ve arbiylerge qarşı cenk cinayetleri alâqası olğanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
