Dekabrniñ 5-nde saba Rusiye arbiyleri Hersonğa ateş açtı, dep bildirdi Ukrayına prezidentiniñ ofis reberi Andriy Yermak.
«Rusiyeliler Hersonğa kene ateş açtı, vatandaşlarnı öldürdi», – dep yazdı Yermak.
Onıñ aytqanına köre, eki yerli sakinniñ vefatı belli oldı, daa bir insan yaralandı.
Herson vilâyetiniñ arbiy memuriyet yolbaşçısı Oleksandr Prokudin bildirgenine köre, dekabrniñ 5-nde saba Rusiye arbiyleri Herson vilâyetine ateş aça ve yerli sakinler sığınaqlarda qalmalı.
Rusiye ordusı aman-aman er kün işğalden azat etilgen Hersonğa ateş aça. Delillerge baqmadan, Moskva büyük istilâ başlağanından berli vatandaşlarğa ücüm etkenini inkâr ete.
Birleşken Milletler oktâbrniñ 21-ne qadar Ukrayınada Rusiyeniñ büyük istilâsı neticesinde 10 biñ insannıñ ölümini ve 18500 insannıñ yaralanğanını tasdıqladı. Bu teşkilât qurbanlarnıñ kerçek sayısı daa yüksek, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
