Yanvarniñ 12-sinde Herson şeerinde Qırımda tutılıp alınğan qırımtatar faali Edem Bekirovğa ve bütün “qanunsız tutılıp alınğan Ukraina vatandaşlarına” qol tutuv miting keçirildi. Bu aqta Qırım.Aqiqat mühbiri bildirmekte.
Hersondaki mitingge Geniçesk rayonından Edem Bekirovnıñ qadını, Genişesk rayon devlet memuriyetiniñ baş muavini Gülnara Bekirova keldi. O destek içün er keske minnetdarlığını bildirdi ve aqayınıñ sağlıq alı aqqında aytıp berdi.
“Bugün (Edem Bekirovnıñ tevfiqinden) 32-nci künde men yañğız qalmadım. Men er aktsiyanıñ er teşkilâtçısına minnetdarım. Biz dediler ki, onı yanvar 14-ünde Semaşko adına hastahanege tibbiy şaatlav keçirmek içün alıp baracaqlar. Olar bir komissiya toplap qarar alacaqlar: bu adam kerçekten hasta olsa, o tibbiy bölükte bulunacaq, amma, olarnıñ fikrine köre, bu tasdıqlanmasa, o SİZOda bulunacaq. Bugünge Edem SİZOda buluna ve özüne özü sarğılar yapa ve olğanı kibi özüni baqa. Menimce, o dayanır, bütün küçüni toplar”, - dedi Bekirova.
Herson şeer meclisiniñ başlığı ve aktsiya teşkilcisi İbragim Suleymanovnıñ fikrince, şeker hastalığı olğan Edem Bekirovğa “cemaat qıynavı”nı yaptılar.
“Bu kerçekten açıq, cemaat idamı, cemaat qıynavı. Buña başqa türlü bir şey demezsiñ. Bu - onıñ noqta-i nazarları, blokadada iştiragi, ve niayet qırımtatar ve Ukraina vatanperveri olğanı içün intiqamdır. Ve, belki de, başqalarnı qorqutmaq usulı”, - dedi Süleymanov.
Edem Bekirov ve ukrain siyasiy mabüslerine öz destegini Herson vilâyetiniñ halq azlıqları da bildirdi.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Ukraina Tış işler nazirligi mahkemeniñ qararına qarşı «sert narazılıq» bildirdi.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
