Hersonda yanvarniñ 12-nde Qırımda apiske alınğan qırımtatar faali Edem Bekirov ve «qanunsız tutulğan diger Ukraina vatandaşlarına» qoltutuv mitingi keçirilecek.
Bu aqta Hersondaki şeer Meclisiniñ Facebook saifesinde haber etile.
«Qırım işğaliniñ birinci kününden başlap qırımtatarlar ve ukrainler Qırımnıñ işğalci akimiyeti tarafından uydurılğan cinayetlerde qabaatlana. Soñki beş yıl devamında onlarnen cemaat faali öldürildi, azaplarğa oğratıldı, qanunsız mahküm etildi ve ğayıp oldı. Az olmağan adiseler Rusiyeniñ insan aqlarına riayet etmeyip aqaretlegenini köstere, o, devlet terrorını amelge keçirgen diger devletlernen bir sırağa tüşe», – dep aytıla haberde.
Mecliste qayd etkenlerine köre, Qırımnıñ kirişinde tibbiy yardımğa ve ilâcğa muhtac Edem Bekirovnıñ tutulması «Ukraina vatandaşına qarşı yapılğan işkence ve dünya toplulığınıñ diqqatını celp etecek azap ola».
Rusiye kontrolindeki Qırım Yuqarı mahkemesi yanvarniñ 10-nda Edem Bekirovnıñ apiske alınmasına qarşı itiraz arizalarını baqmağa planlaştıra.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler.
Kreml kontrolindeki Aqmescitniñ Kiyev rayon mahkemesi dekabrniñ 13-nde Bekirovnı eki ayğa apiske aldı. O, 2019 senesi fevralniñ 11-ne qadar nezaret altında qalacaq. Ukraina Tış işler nazirligi mahkemeniñ qararına qarşı «sert narazılıq» bildirdi.
