Aprelniñ 21-nde, çarşenbe künü, Hersonda Rusiye işğal etken Qırımğa suv berilmesine qarşı olğan faaller Herson vilâyet devlet memuriyetiniñ binasına öz mevamını bildirmek ve bunıñ aqqında Herson vilâyeti reberliginin fikrini eşitmek içün keldiler. Bunı Qırım.Aqiqat mühbiri bildirdi.
«Soñki ayda bu mevzu ğayrıdan ortağa çıqtı. Vaziyet kerginleşe. Türlü teşkilât ve areketlerniñ temsilcileri ile beraber toplanıp bu meseleni Azatlıq Meydanında vilâyet akimiyetinen muzakere etmege qarar berdik. Biz akimiyetniñ mevamını bilmek içün keldik», – dedi «Herson samooboronası» cemaat areketiniñ başı İnna Usaçeva.
Onıñ sözlerine köre, arbiy talimler ve Rusiyeniñ tecavuziy ritorikası sebebinden Qırım ile memuriy sıñırdaki vaziyet kerginleşkeni içün bu mevzu «bir uğunlaşma qattı» ola bilir, bunıñ içün akimiyetniñ mevamını añlamaq kerek.
Herson vilâyet devlet memuriyeti başınıñ muavini Nikolay Yakimenko faallerniñ qarşısına çıqtı.
«İşğalden azat etilgenine qadar iç kimse Qırımnı suv ile temin etmeycek», – dedi o.
Yaqın kelecekte faaller Qırımnıñ suv techizatı meselesinde mevamını eşitmek içüye Herson şeer başı İgor Kolıhayevnen körüşecek olalar.
Hatırlatamız ki, evel Herson şeer başı İgor Kolıhayev iqtisadiy munasebetler tarafdarı olğanını aytıp, Qırım işğalden azat etilgenine qadar suvnıñ satılmasına qoltutqanını bildirgen edi.
Qırımnıñ suv teminlevi
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
2020 senesi Qırımdaki suv teminlevi vaziyeti kritik oldı. Qırımlı alimlerniñ bildirgenine köre, yağanaqlar yağmağanı içün ve qar az yağğan qış neticesinde qurğaqlıq oldı.
Avgustnıñ soñunda Aqmescitte, Aqmescit ve Bağçasaray rayonlarında suv berüv cedvelleri kirsetilgen edi. Daa soñra Qarasuvbazarda, Qarasuvbazar rayonında ve qısmen Aluştada cedveller kirsetildi.
Kreml kontrolindeki Qırım yolbaşçısı Sergey Aksenov Rusiye Qırımnıñ suv teminlevini fevqulâde vaziyet olaraq tanıması mümkün, dep ayta. O, 2020 senesi 150 yıl içinde eñ quru oldı, dep bildirdi.
Rusiye akimiyeti yañı suv boruları, suv qoralarınıñ quruluvına ve quyu qazıluvına milliardlarnen ruble ayırdı.
BM Ukraina Monitoring missiyası, halqara uquqqa köre, Rusiye Qırım ealisini suvnen temin etüvden mesüliyetli ola, dep israr ete.
Resmiy Kyiv, Şimaliy-Qırım kanalından suv yarımadağa tek Qırım işğalden qurtarılğan soñ berilecek, dep bildire.
