Avgustnıñ 30-nda Sabadan berli Rusiye ordusı işğal etken Hersonda patlavlar eşitile, dep bildire «Suspilne» Ukrayına cemaat teleradiokompaniyası.
«UNIAN» Ukrayına agentligi yerli saifelerge esaslanıp bildirgenine köre, salı künü saba Hersonda patlav ve atışlar eşitile. Agentlik sakinler çıqarğan videonı derc etti.
«UNIAN» TSN mühbiri Olena Vaninanıñ malümatını da bildire. Onıñ bildirgenine köre, Ukrayına arbiyleri Hersonda Rusiye ordusınıñ tehnikası olğan yerge ücüm etti, soñra da – rusiyelilerniñ arbiy bölügine.
TASS Rusiye agentligi avgustnıñ 30-nda saba Hersonda Ukrayına istihbarat-diversiya gruppasınen uruş oldı, dep bildirdi, Rusiye arbiyleri gruppa yoq etildi, dep haber etti.
Ukrayına prezidentiniñ ofisi avgustnıñ 30-nda Herson vilâyetiniñ bütün topraqlarında küçlü uruşlar ve kündüz ve gece devam etken küçlü patlavlar aqqında bildirdi. Bu aqta AFP agentliginiñ haberinde prezident ofisiniñ brifingine esaslanıp yazılğan.
Avgustnıñ 29-nda «Kahovka» operativ ordu gruppirovkası «DNR» gruppirovkasınıñ 109-ıncı atıcılar polku mevzilerinden çekildi, «Rusiye desantçıları ise uruş meydanından qaçtı». Kütleviy haber vastaları menbalarına esaslanıp, Ukrayına silâlı quvetleriniñ Ukrayına cenübindeki qarşı ücüm tedbirleri aqqında bildirdi – Ukrayına arbiyleri Herson vilâyetindeki işğalci ordunıñ birinci mudafaa sıñırını keçti.
Rusiye Mudafaa nazirligi avgustnıñ 29-nda aqşam Ukrayına ordusı Mıkolayıv ve Herson vilâyetlerinde üç yönelişte ücüm etmege tırıştı, büyük zararlar kördi, ücüm ise «muvafaqiyetli olamadı», dep bildirdi.
Ukrayına prezidenti Volodımır Zelenskıy aqşam muracaatında Rusiye arbiyleri yaşamağa istese, «qaçmağa vaqıt keldi», dep ayttı.
«Ukrayına özüne ait olğanlarını qaytara. Harkiv, Luğansk, Donetsk, Zaporijjâ, Herson vilâyetlerii, Qırımnı, Qara ve Azaq deñizlerini mıtlaqa qaytaracaq», – dep qayd etti Zelenskıy. O, birisi Kyivniñ planları aqqında tam bir şey eşitmege istese, «iç bir mesüliyetli kişi malümat bermeycek», dep ayttı. «Bu cenktir», – dep qoştı Ukrayına prezidenti.
Ukrayına prezidentiniñ ofis mesleatçısı Oleksiy Arestovıç salı künü Ukrayına silâlı quvetleri rusiyelilerniñ köpürlerden temin etilüvini toqtattı ya da aman-aman toqtattı, Herson vilâyetindeki parom keçitlerini yoq etti, dep bildirdi. Arestovıç salı künü eñ az eki keçit yoq etildi, dep qoştı.
Rusiye fevralniñ 24-nde Ukrayınağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayınadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayınanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayınanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
