Rusiye ordusı dekabrniñ 24-nde saba Hersonnıñ merkezine ateş açtılar, eñ az beş kişi elâk oldı, 20 insan yaralandı, dep bildirdi Ukrayına prezidentiniñ ofis yolbaşçısınıñ muavini Kırılo Tımoşenko.
«Rusiyeliler daa bir terror yaptı: şeerniñ merkezine ateş açtılar! İnsanlar elâk oldı, binalar yıqıldı. Şeer merkezi, raatlıq künü, bir çoq insan tışarıda. Bütün hızmetler çalışa, neticelerini teşkeremiz», – dep yazdı o, Telegramda.
Ukrayına prezidenti Volodımır Zelenskıy Telegramda adise yeriniñ fotoresimlerini paylaştı.
«İçtimaiy ağlar bu fotoresimlerni «hassas münderice» dep işaretleycektir. Amma bu hassas münderice degil – Ukrayına ve ukrayınalılarnıñ kerçek ayatı. Terrorist memleket «rus dünyasını» vatandaşlarğa ateş şeklinde ketire. Herson. Saba, cumaertesi, Milât bayramı arfesinde, şeerniñ merkeziy qısmında. Bu arbiy obyektler degil, bu qanunlarğa köre bir cenk degil. Bu bir terror, qorquzmaq ve zevq içün öldürüv. Dünya nasıl bir yamanlıqqa qarşı cenkleşkenimizni körmek ve añlamaq kerek», – dep yazdı Ukrayına prezidenti.
Yerli akimiyetniñ malümatına köre, keçken künü Herson vilâyetinde Rusiye ordusınıñ ateşi neticesinde beş vatandaş elâk oldı, 17 kişi yaralandı, bir bala ağır alda buluna.
Noyabr ayında Rusiye ordusı Hersondan çekilgen soñ şeerge ve Ukrayına akimiyeti kontrol etken vilâyet yerlerine ateş açıla.
Dekabrniñ 13-nde Herson vilâyetiniñ deputatı Sergey Hlan Azatlıq Radiosına izaat berip, Herson işğalden azat etilgende anda 80 biñ kişi yaşay edi – şimdi aman-aman 10 insan şeerden ketti.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
