Hersondaki işğalci akimiyet mayısnıñ 9-nda bayram tedbirlerini keçirmege azırlana, dep bildire şeer yolbaşçısı İgor Kolıhayev Ukraina umummilliy telemarafonınıñ yayınında.
«İşğalci akimiyet mayısnıñ 9-nı zafer bayramı olaraq qayd etmege azırlana. Olar bayramğa azırlanalar, veteranlar, cenk balalarınen laf eteler, tedbirlerge kelmelerini isteyler», – dep qayd etti o.
Aprelniñ 11-nde Melitopol şeer yolbaşçısı İvan Fedorov da Rusiye arbiyleri ve yerli satqınlar mayısnıñ 9-na faal azırlanalar, dep bildirdi. Fedorovnıñ aytqanına köre, «mayısnıñ 9-nda Rusiye quvetleri Melitopolde provokatsiyalarğa azırlana».
Aprelniñ 26-nda belli olğanına köre, Rusiye işğalci quvetleri şeer ve vilâyetniñ öz reberlerini tayin etti. Herson vilâyeti arbiy memuriyetiniñ yolbaşçısı aytqanına köre, sahte «Herson vilâyet memuriyetiniñ reisi» Vladimir Saldo ve «Herson şeer memuriyetiniñ reisi» Aleksandr Kobets tanıtıldı.
Rusiye ordusı Hersonğa martnıñ 1-nde ücüm etti. O vaqıttan berli şeer işğal altında buluna. Yerli sakinler «Herson – Ukrainadır» şiarlarınen barışıqsever mitinglerge çıqa. Aprelniñ 27-nde Rusiye işğalcileri böyle mitingniñ iştirakçilerini dağıtmaq içün ışıq ses granatalarını ve köz yaşlatqan gaz qullandı. Dört kişi zarar kördi.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d2ud65mnh9spru.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
