Herson vilâyetiniñ zapt etilgen qısmınıñ Rusiye işğalci memuriyetiniñ yolbaşçısı Vladimir Saldo İlk yaznıñ 10-nda saba Geniçeskten Arabat keçitindeki köpürlerden birine ücüm etilgenini bildirdi. Haberni o, resmiy telegram kanalına yerleştirdi.
"İlk malümatqa köre, saba erte duşman Geniçesk köpürlerinden birinden Arabat beline raketa ücümini yapmağa tırıştı. Yol areketi vaqtınca toqtatıldı, vaziyet ögrenile", — dep yazdı o.
Biraz vaqıt keçken soñ, Saldo, mütehassıslar zarar körgen köpürni teşkerip bitirgenlerini ve Arabat ve Geniçesk arasındaki köpürde areketni ters rejimde başlatqanlarını bildirdi. Tamir işleri bir yolaqta yapılacaq.
Ukrayina arbiyleri vaziyetni şimdilik izaatlamadı. Qırım.Aqiqat muarririyeti bu malümatnı arbiy areketler şaraitlerinde teşkerip olamay.
İşğalni ögrenüv Merkeziniñ reberi Petr Andreşçenko öz telegram kanalında bildirdi ki, darbe Geniçesk ve Arabat beli rayonındaki üç köpürden birine tüşmesi olmaq mümkün.
Onıñ aytqanına köre, bu marşrutnıñ qapatıluvı Çonğar köpründeki problemlernen beraber Rusiye ordusınıñ logistikasını qıyınlaştıra.
Hatırlatamız, Saldo, İlk yaznıñ 9-na keçer gecesi Rusiye tarafından ilhaq etilgen Qırımnı Herson vilâyetiniñ Rusiye ordusı kontrol etken qısmı ile bağlağan Çonğar köprüne ücüm etildi, dep bildirdi. Köprü zarar kördi, areket vaqtınca toqtatıldı.
Ukrayina arbiyleri İlk yaznıñ 7-nde Çonğar köprüne ücüm ettiler. O vaqıt Qırım ve Herson vilâyetiniñ memuriy sıñırındaki "Canköy" avtomobil keçiş noqtasından da areket vaqtınca toqtatılğan edi.