Herson vilâyetiniñ eñ az 575 sakini Rusiye tarafından hırsızlandı. Bu aqta «KrımSOS» aq qorçalayıcı teşkilâtınıñ idare yolbaşçısı Oleksiy Tilnenko bildirdi.
«Bu insanlardan bazılarını Qırımdan Rusiyege alıp keteler. Esirler işkencege oğratıla, tibbiy yardım alamay», – dep qayd etti o.
Arbiy esirlerni deñişüv olsa, hırsızlanğan vatandaşlarnı azat etüv mehanizmi daa şekillendirilmedi. Cenk qanunları ve adetleri vatandaşlarnı esir almağa izin bermey, şunıñ içün ukrayınalı esirler Rusiye Federatsiyasında reine statusında buluna.
«Olarnı tutıp, ne tuvğanları, ne de devlet organlarınen bağğa çıqmaylar. Soyları advokatlar vastasınen tutulğannıñ vaziyetini ve nede qabaatlanğanını bilmege tırışsa, sıq-sıq bu suallerniñ cevabını alamay. Rusiye bu insanlarnıñ Qırımda ya da Rusiyede bulunğanını gizley», – dep qoştı Tilnenko.
ZMINA insan aqları merkezi Qırımdaki menbalarına esaslanıp, rusiyeliler işğal etilgen topraqlardan işğal altındaki Qırımğa qanunsız çıqarğan ukrayınalılar Aqmescit SİZOsında ayrı binalarda tutula, dep bildire. Olar işkencege oğratıla, advokatlar kirsetilmey.
Hatırlatamız, Rusiye Federatsiyası işğal etken Ukrayına topraqlarından hırsızlanğan ukrayınalılarğa qarşı işkence aqqında qırımtatar faali ve siyasetçi Nariman Celâl tarif etken edi.
Rusiye Federatsiyasınıñ mahkemesi tarafından «Noman Çelebicihan batalyonında» iştirak etkeninde qabaatlanıp, sert rejimli koloniyada beş yıl qalmasına üküm etilgen Herson vilâyetiniñ 31 yaşında sakini Ruslan Abdurahmanov da Rusiye uquq qoruyıcıları tarafından işkencege oğratılğanını bildirdi.
«Agentstvo» Rusiye neşiri, Aqmescit SİZOsında işğal etilgen Ukrayına topraqlarında Rusiye ordusı ya da mahsus hızmetleri tarafından zapt etilgen 50-den 100-ge qadar ukrayınalı tutula, dep bildirgen edi.
Rusiye akimiyeti ve mahkemesi işğal etilgen topraqlarda ukrayınalılar tutulğanını tasdıqlay, lâkin sayısını aydınlatmay.
