Bugünge qadar Ukrayina Silâlı Quvetleri Herson vilâyetiniñ 46 meskün yerini işğalden azat etti. Bunı Herson vilâyetiniñ arbiy memuriyetiniñ yolbaşçısınıñ muavini Dmıtro Butriy haber etti.
"Bugüngece Herson vilâyetiniñ artıq 46 meskün yeri işğalden azat etildi. Büyük qısmı Dnipro vilâyetinen sıñırdaş olğan vilâyetniñ şimalidir ve biraz Mıkolayiv vilâyeti ile sıñırda olğan vilâyetniñ cenübi", - dedi Butriy.
Onıñ sözlerine köre, vilâyet bütünley azat etilgenine qadar ealiniñ daa telükesiz bölgelerge tahliye etilmesi kerek.
İyülniñ 27-ne keçken gecesi "Cenüp" operativ komandanlığı Herson vilâyetiniñ Andriyivka köyü azat etilgenini haber etti. Bundan bir qaç kün evelsi Lozove azat etilgen edi.
İyülniñ 18-nde Ukrayina prezidenti Volodımır Zelenskıy fevralniñ 24-nden ukrayin quvetleri 1028 şeer ve qasabanı azat etip olğanını bildirdi.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
