Beş Rusiye uçağı Herson vilâyetine ücüm etti, dep bildirdi vilâyetniñ arbiy memuriyet yolbaşçısı Oleksandr Prokudin.
«Duşman beş uçaqtan Herson vilâyetine ücüm etti. İlk malümatqa köre, Berıslav rayonınıñ dört mesken yerine 9 ava bombası atıldı», – dep yazdı o, Telegram kanalında.
Yaralanğanlar aqqında malümat daa yoq.
Rusiye ordusı aman-aman er kün işğalden azat etilgen Hersonnı ücümge oğrata. Delillerge baqmadan, Moskva büyük istilâ başlağanından berli Ukrayınada vatandaşlarğa darbe endirgenini inkâr ete.
Birleşken Milletler oktâbrniñ 8-ne qadar Ukrayınada Rusiyeniñ büyük istilâsı neticesinde 9806 insannıñ ölümini ve 17962 insannıñ yaralanğanını tasdıqladı. Bu teşkilât qurbanlarnıñ kerçek sayısı daa yüksek, dep qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
