Herson vilâyetinde bir künde Rusiye açqan ateş neticesinde üç kişi elâk oldı, 16 insan yaralandı, dep bildirdi Herson vilâyetiniñ arbiy memuriyet yolbaşçısı Oleksandr Prokudin dekabrniñ 17-nde saba.
«Keçken künü duşman 161 kere ateş açıp, mayın atıcı, top, «Grad», tank, aviatsiya ve uçucısızlardan 853 snarâd attı, yedisi –Shahed. Herson şeerine 90 snarâd atıldı», – dep yazdı Prokudin Telegram kanalında.
Onıñ malümatına köre, Rusiye akimiyeti vilâyetniñ mesken yerlerine, infrastruktura obyektleri, müessise, alış-veriş merkezi, Hersondaki demiryol vokzalı ve Herson rayonındaki oquv yurtuna ücüm etti.
Dekabrniñ 26-nda aqşam Rusiye ordusı Hersondaki demiryol vokzalına qarşı darbe endirdi. Ukrayına İç işler naziri İğor Klımenkonıñ aytqanına köre, ücüm vaqtında anda tahliye trenini beklegen tahminen 140 barışıqsever vatandaş buluna edi.
Herson vilâyetiniñ arbiy memuriyet yolbaşçısı Oleksandr Prokudin bildirgenine köre, darbe neticesinde Kirovoğrad vilâyetinden polis leytenantı can berdi. Eki işdeşi ve eki vatandaş yaralandı.
«Ukrzaliznıtsânıñ» resmiy Telegram kanalı darbe neticesinde vokzal ve tren zarar kördi, bir qaç hadimi yaralandı, dep haber etti. Tahliye trenini beklegen yolcular avtobuslarnen Mıkolayıvge ketti.
Rusiye ordusı aman-aman er kün Herson vilâyetiniñ işğalden azat etilgen qısmına ve vilâyet merkezine ateş ete. Delil ve şaatlıqlarğa baqmadan, Moskva büyük istilâ başlağanından vatandaş şahıslarına qarşı ücümni inkâr etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
