Ukrayina prezidenti Volodımır Zelenskıy Hersonnıñ işğalden azat etilgen topraqlarından qanun qoruyıcılar artıq 400-den ziyade cinayet vesiqalaştırdı, dep bildirdi.
"Tahqiqatçılar artıq 400-den çoq rusiye arbiy cinayetini vesiqalaştırdı, em silâsız adamlarnıñ, em de arbiylerniñ cesedleri çıqa. Herson vilâyetinde RF ordusı diger bölgelerdeki kibi canavarlıqlar qaldırdı. Er bir qatilni tapıp, mesüliyetke çekermiz. Şübesiz", - dedi devlet başı.
Herson vilâyetiniñ işğalden azat etilgen topraqlarında terk etilgen rusiye arbiylerini ve ücretli askerlerini yaqalamağa, diversantlarnı zararsızlaştırmağa devam etemiz. dedi prezident.
Herson ve vilâyetniñ bir qısmı rusiye arbiyleri tarafından martnıñ başında işğal etildi. Noyabrniñ 11-nde Ukrayina Mudafaa nazirligi Herson Ukrayina ordusınıñ nezareti altına qaytqanını ilân etti. Şeerniñ merkezinde Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
