Ukrayına akimiyeti bildirgenine köre, Kahovka gidroelektrostantsiyası patlatılğan soñ Herson vilâyetiniñ 600 kilometr kâresi suv altında qaldı.
«Orta suv seviyesi – 5,61 metr. Vilâyetniñ 600 kilometr kâresi suv altında, 32%-ı – sağ taraf ve 68%-ı – sol taraf», – dep bildirdi vilâyetniñ arbiy memuriyet yolbaşçısı Aleksandr Prokudin.
Onıñ aytqanına köre, tahliye devam ete, saat 6:00-da regionnıñ telükeli rayonlarını 1999 insan terk etti, eñ çoq Hersondaki Korabel rayonında – 1495.
Herson vilâyetiniñ meydanı 28461 metr kâredir.
Bundan ğayrı, bir künde Kahovka suv anbarında suv seviyesi bir metr eksildi, dep bildirdi «Ukrğidroenerğo». Suv uluq benti bozulmağa devam ete.
Ukrayına İç işler nazirliginiñ malümatına köre, iyünniñ 7-nde aqşam Herson vilâyetiniñ sağ tarafında 20 mesken yerni suv bastı, 1900 insan tahliye etildi, 103-ü – bala.
ASTRA Telegram kanalınıñ malümatına köre, qayıq ve qurtaruv yelekleri olğan göñüllilerni Rusiye akimiyeti Öleşkı, Novi Solontsı, Kohanı ve diger köylerge kirsetmey, anda suv basqan evlerniñ damlarında insanlar otura.
Ukrayına prezidenti Volodımır Zelenskıy «dünyanıñ tam ve tez cevabı berilmeli», çünki Herson vilâyetiniñ işğal etilgen qısmında «felâket bar».
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
