2024 senesi Rusiye arbiyleri Herson vilâyetine 2023 senesine baqqanda bir buçuq qat sıq ücüm etti, dep bildirdi Herson vilâyet arbiy memuriyetiniñ başı Aleksandr Prokudin ukrayin tele marafonı efirinde.
Memur qayd etti ki, "Rusiye Herson vilâyetiniñ sakinlerine qarşı terror taktikasından vazgeçmey, aksine, onı quvetleştire".
"2024 senesi ücümlerniñ sayısı bir buçuq qat arttı. İşğalciler bir yıl içinde 218 biñ mermi attılar, bu bir yıl evelsi olğanından 63% ziyade. Zarar körgen vatandaşlarnıñ sayısı da arttı. 2024 senesi Rusiye ücümleri neticesinde 2 187 insan yaralandı ya da elâk oldı.
Bu, 2023 senesinden 200-den ziyade adam ziyade", — dep qayd etti Prokudin.
Bundan da ğayrı, vilâyet yolbaşçısı qayd etti ki, "yañı ciddiy telüke olaraq, 2024 senesi avgust ayından berli rusiyeliler tarafından vatandaşlarğa qarşı qullanılğan dron ücümleri sayıla. Böylece, 5 ay içinde duşman dronlarınıñ aman-aman 12 biñ ücümi oldı, 54 insan elâk oldı, daa 609 kişi, olarnıñ arasında 8 bala yaralandı".
Rusiye arbiyleri Ukrayina regionlarına çeşit silâ çeşitleri ile ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
