Keçken künü Rusiye Federatsiyası Herson vilâyetine aviatsiya yardımınen sekiz kere ücüm etti, elâk olğanlar ve yaralanğanlar bar, dep bildirdi Herson vilâyetiniñ arbiy memuriyet yolbaşçısı Öleksandr Prokudin.
«Sağ tarafnıñ baraşıqsever ealisine qarşı 35 bomba atıldı. Ateşler neticesinde bala elâk oldı. 13 yaşında oğlan ağır yaralandı. Ekimler gençniñ can bergenini ayttı... Elâk olğan balanen beraber daa eki erkek yaralandı. 43 yaşında erniñ omzu yaralandı, 35 yaşında olğan erkekniñ közleri zarar kördi ve betinde yaralar bar. Ekisiniñ de mayın-patlayıcı yaralar», – dep bildirdi Prokudin Telegramda.
Herson vilâyetiniñ arbiy memuriyet yolbaşçısı bildirgenine köre, keçken künü Rusiye ordusı 51 kere ateş açıp, mayın atıcı, top, «Grad», tank, aviatsiya ve uçucısızlardan 365 snarâd attı.
Rusiye ordusı aman-aman er kün işğalden azat etilgen Hersonğa ateş aça. Delillerge baqmadan, Moskva büyük istilâ başlağanından berli vatandaşlarğa ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
