Link açıqlığı

Saatnıñ esas haberi

Herson vilâyetiniñ eñ az 600 sakini Rusiye Federatsiyası tarafından hırsızlandı – «Krım SOS»


Oleksiy Tilnenko
Oleksiy Tilnenko

Herson vilâyetinde eñ az 600 Ukrayına vatandaşı hırsızlandı, çoqusı alda olarnı Rusiye işğal etken Qırımğa çıqaralar. Bu aqta «Krım SOS» aq qorçalayıcı teşkilâtınıñ idare reisi Oleksiy Tilnenko «Faktı» içün bergen intervyüsında ayttı.

«Herson vilâyeti aqqında aytsaq, eñ az 600 adise qayd etildi. İşğal etilgen Qırımda insanlarnı işğal etilgen Herson ve Zaporijjâ vilâyetlerinden çıqaralar. Bazılarını SİZOda, polis bölüklerinde ya da Ukrayına telükesizlik hızmetinde üç kün, aftalarnen tutalar, bazılarına anda aylarnen işkencege oğratıp tutalar. Er şey insanğa bağlı, hırsızlav olğan vaziyetke bağlı», – dep tarif etti Tilnenko.

«Krım SOS» bildirgenine köre, arbiy esir ve vatandaş reineleriniñ meselelerinen oğraşqan aq qorçalayıcılarnıñ «sıcaq ağına» büyük istilâ başlağanından hırsızlanğan ve esir alınğan insanlarnen bağlı 1200-den çoq muracaat keldi.

Yanvarniñ 3-nde «Krım SOS» aq qorçalayıcı teşkilâtınıñ idare yolbaşçısı Oleksiy Tilnenko Rusiye tarafından hırsızlanğan Herson vilâyetiniñ 575 sakini aqqında bildirdi.

ZMINA insan aqları merkezi Qırımdaki menbalarına esaslanıp, rusiyeliler işğal etilgen topraqlardan işğal altındaki Qırımğa qanunsız çıqarğan ukrayınalılar Aqmescit SİZOsında ayrı binalarda tutula, dep bildire. Olar işkencege oğratıla, advokatlar kirsetilmey.

Hatırlatamız, Rusiye Federatsiyası işğal etken Ukrayına topraqlarından hırsızlanğan ukrayınalılarğa qarşı işkence aqqında qırımtatar faali ve siyasetçi Nariman Celâl tarif etken edi.

Rusiye Federatsiyasınıñ mahkemesi tarafından «Noman Çelebicihan batalyonında» iştirak etkeninde qabaatlanıp, sert rejimli koloniyada beş yıl qalmasına üküm etilgen Herson vilâyetiniñ 31 yaşında sakini Ruslan Abdurahmanov da Rusiye uquq qoruyıcıları tarafından işkencege oğratılğanını bildirdi.

«Agentstvo» Rusiye neşiri, Aqmescit SİZOsında işğal etilgen Ukrayına topraqlarında Rusiye ordusı ya da mahsus hızmetleri tarafından zapt etilgen 50-den 100-ge qadar ukrayınalı tutula, dep bildirgen edi.

Rusiye akimiyeti ve mahkemesi işğal etilgen topraqlarda ukrayınalılar tutulğanını tasdıqlay, lâkin sayısını aydınlatmay.

Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG