Herson vilâyetinde Rusiye arbiyleri 150-ge yaqın yaralanğannı ve tahminen 50 dane tehnikanı Kahovka gidroelektrik stantsiyası yanındaki Vesele köyüne aldı, dep haber etti Ukrayına Silâlı quvetleriniñ Baş ştabı.
«Herson yönelişinde Mudafaa quvetleriniñ muvafaqiyetli areketleri neticesinde duşmannıñ bölükleri zarar kördi ve yaralanğanlarnı ve zarar körgen tehnikanı Dnipro özeniniñ yaqın keçitlerine tahliye etmege tırışa. Hususan Kahovka gidroelektrik stantsiyası yanındaki Vesele mesken yerine duşman tahminen 150 yaralanğannı ve tahminen 50 dane arbiy tehnikanı avuştırdı», – dep aytıla haberde.
Ukrayına Silâlı quvetleriniñ Baş ştabı malümatına köre, vaqtınca işğal etilgen Lugansk vilâyetinde yaralanğanlar çoq olğanı ve yerli hastahaneler tolğanı içün Rusiye ordusı mektepni arbiy hastahane olaraq qullana.
İlk malümatqa köre, anda yaralanğan tahminen 200 Rusiye arbiyi buluna.
Reuters agentligi oktâbrniñ 3-nde bildirgenine köre, Ukrayına quvetleri Rusiye mudafaasını keçip, Dnipro özeni boyunca tez ilerilep, Rusiyeniñ büyük ücümi başlağanından cenüpte eñ büyük ilerilev yaptı. Rusiye tarafı Herson vilâyetinde ordusı çekilgenini vastalı olaraq tasdıqladı. Kütleviy haber vastalarınıñ malümatına köre, oktâbrniñ 4-nde Rusiye Mudafaa nazirliginiñ köstergen uruş haritası Rusiye ordusınıñ Herson vilâyetinde aman-aman 30 kilometrge çekilgenini köstere.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
