Rusiye ordusı yanvarniñ 8-nde saba Herson vilâyetiniñ bir qaç rayonına uçucısızlarnen ücüm etti. Ücümler neticesinde üç yerli sakin yaralandı, dep haber ete regional arbiy memuriyet.
«Rusiye ordusı Naddneprânskoyege drondan ücüm etti. 57 yaşında bir adam duşman ücümine oğradı. O, patlav yarası alğan, baş sarsıtqan, başına çoqtan-çoq parça yarası ve ög qolunıñ açıq sınığını bar», – dep qayd etile haberde.
Rusiye askerleri Berislavğa da ücüm etti, dep haber ete yerli akimiyettekiler.
«Drondan patlayıcı maddeniñ tüşürilmesi sebebinden 66 yaşında erkek patlavdan yaralandı ve qolunda yara oldı. 69 yaşında qadınnıñ qollarında, ayaqlarında, başında ve qursağında patlav yarası ve parça yaraları diagnozı qoyuldı. Yaralanğanlar hastahanede buluna», – dep bildire Herson vilâyetiniñ arbiy memuriyeti.
Rusiye akimiyeti, Rusiye ordusı Ukrayinanıñ şeer ve köyleriniñ grajdan infrastrukturalarına, hastahaneler, mektepler, bala bağçaları, energetika ve suv teminlevi obyektlerine ücüm etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Yañı yıl hayırlavında Ukrayina prezidenti Volodımır Zelenskıy qayd etti ki, 2024 senesi ava mudafaa küçleri 1310 qanatlı ve ballistik raketanı ve 7800-den ziyade İran Shahedini urıp tüşürdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
