Herson vilâyetiniñ Rusiye içün strategik emiyeti bar. Bunı Qırım.Aqiqatqa Ukrayina Mudafaa nazirliginiñ Baş istihbarat idaresiniñ temsilcisi Vadim Skibitskiy bildirdi.
"Herson vilâyetinde Rusiye ilk künlerden başlap platsdarm olması içün pek teren, eşelonlı mudafaa qurıp başladı. Hersonnıñ Rusiye içün bir çoq aspektelerde, ilk nevbette de Qırımnıñ suv, elektrik ile temin etilmesinde müim olğanını añlaymız. Ekincisi, bu, topraqlarımıznıñ içerisine soñraki ücüm ameliyatları içün bir platsdarmdır. Keri çekileceklermi? Olarnı mında sıqıştırıp çıqarmaq kerek. Şunıñ içün er kes qarşı ücümge keçmek içün azırlana. Ve kerçekten artıq işğal etilgen topraqlarnı azat etip başlamaq", - dedi Skibitskiy.
Soñki vaqıtları Ukrayina Silâlı Quvetleri bölgede duşmannıñ arbiylerine ve tehnikasına darbeler endirmekte. Bir qaç köpür de, hususan Hersondaki Antonov köprü bozuldı.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrayinalılarnıñ tirenüvi sebebinden Kıyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
