Sentâbrniñ 14-ne keçer gecesi Rusiye ordusınıñ Herson vilâyetine qarşı açqan ateşi neticesinde altı yaşında bala elâk oldı, daa dört insan yaralandı, dep bildirdi Herson vilâyetiniñ prokuraturası.
«Tahqiqatnıñ malümatına köre, 2023 senesi sentâbrniñ 14-nde saat 00:00-dan soñ işğalciler Herson vilâyeti Belozerka qasabasınıñ Novodmitrovka köyüne toplardan ateş açtı. Duşman snarâdları mustaqil evge tüşti. Alğan yaralar sebebinden 6 yaşında oğlançıq can berdi. 13 yaşında ağası ağır alda hastahanege ketirildi», – dep aytıla haberde.
Yardım etmege tırışıp, duşmannıñ ateşine oğrağan üç qomşusı da yaralandı.
Ukrayına prokuraturası mustaqil evler, hocalıq inşaatları zarar kördi, dep qoştı.
Herson vilâyetiniñ arbiy memuriyet reisi Oleksandr Prokudin bildirgenine köre, keçken künü Rusiye ordusı vilâyetke 82 kere ateş açıp, mayın atıcı, top, «Grad», uçucısız, tank ve aviatsiyadan 433 snarâd qullandı, neticede bir insan elâk oldı, sekiz kişi yaralandı.
Rusiye ordusı Herson vilâyetiniñ işğalden azat etilgen qısmına ve merkezine aman-aman er kün ateş aça. Delil ve şaatlıqlarğa baqmadan, Moskva vatandaşlarğa qarşı ücüm yapqanını inkâr ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
