Herson vilâyeti devlet memuriyetiniñ yañı yolbaşçısı Yuriy Güsev «Çonğar» ve «Kalançak» keçiş noqtalarında eki keyfiyetli rejim alanını» yılnıñ soñuna qadar tolusınen donatmağa vade ete. Bu aqta Güsev Ukraina prezidenti Volodımır Zelenskıyge iyülniñ 13-nde «Çonğar» keçiş noqtasında bildirdi.
Qırım.Aqiqat mühbiriniñ aytqanına köre, Zelenskıy tam künni aytmağa rica etti.
«Sayğılı prezident, noyabrniñ 15-nde doğğan künüm olacaq. Noyabrniñ 15-nde sizlerni açmağa davet etem, amma yılnıñ soñuna qadar servis merkezlerinen beraber leyhanı kerçekleştirmege planlaştıramız. Avtovokzal, memuriy hızmet merkezleri de aynı. Dekabrniñ 31-ne qadar», – dedi Güsev.
Ukraina prezidentiniñ qayd etkenine köre, leyhanı «dekabrniñ 20-nci künleri» kerçekleştirmege daa yahşı olur.
«Ğromadske», Ukraina Maliye nazirliginiñ malümatına esaslanıp, Qırımnıñ memuriy sıñırındaki «Çonğar» ve «Kalançak» keçiş noqtalarınıñ donatıluvı içün Ukraina ükümetiniñ devlet bücetiniñ yedek fondundan ayırğan aman-aman 106 million ğrıvnâ 2018 senesi qullanılmadı, dep bildirdi. 2019 bücet yılında ise olarnı qullanmaq imkânsız ola.
2018 senesi iyülniñ 4-nde Ukraina ükümeti №584 qararını qabul etti. Oña binaen, devlet bücetiniñ yedek fondundan Qırımnıñ memuriy sıñırındaki «Kalançak» ve «Çonğar» keçiş noqtalarınıñ donatıluvına 105 mln 983 biñ 571 ğrıvnâ ayırıldı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
