Dekabrniñ 6-nda Qırım ve Herson vilâyetiniñ memuriy sıñırında tutulğan Nuri Caferov Qırım hastahanesinde baqılğan soñ evine qayta. Anda onı Rusiye sıñırcılarınıñ üç saattan çoq devam etken sorğusından soñ yaramağanı içün alıp ketkenler.
Bu aqta «Qırım birdemligi» cemaat birleşmesi haber ete.
Nuri Caferovnıñ aytqanına köre, o, asrağan qoyanlarnı almaq içün esas Ukrainadaki Herson ve Mıkolayıv şeerlerine kete edi. Faqat memuriy sıñırdaki pasport kontrolinden keçkende Rusiye sıñırcıları, aytqanı kibi, onı apansızdan sorğu qulübesine ozğardı.
«Şahsiy eşyalarım baqıldı, telefon kitabı baqıldı, belge qadar soyundırğanlar. Bütün suallerge cevap berdim, telefonnı bloktan çıqardım, kösterdim, saqlaycaq bir şeyim yoq, men namuslı bir vatandaşım. Camige barammı dep sorağanlar, ebet dedim. Terroristler, Suriye aqqında sual berip başladılar. Böyle bir şey bilmeyim ve tek er kün televizorda körgenimni ayta bilem, dedim. Olar böyle suallernen maneviy basqı yapmağa başladı. Yaramadım, yiber meni dedim. Soñra acele yardım çağırmağa rica ettim», – dep tarif etti Nuri Caferov.
Bundan soñ Caferovnı memuriy sıñırdan acele yardım alıp ketti. Acele yardım maşinasında tutuluvları başlandı, ekimler ine urıp olamay edi. Caferov hastahanede baqılğan soñ evine yol aldı, dep ayta faaller.
İşğal altındaki Qırım müessiseleri bu malümatnı şimdilik tasdıqlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
