İşğal etilgen Qırım ve Herson vilâyetiniñ memuriy sıñırındaki «Çaplınka» Rusiye keçiş noqtasında Rusiye quvetçileri Nuri Caferovnı üç saattan ziyade tuttı, dep bildire «Qırım birdemligi» cemaat birleşmesi Nuriniñ oğlu Redvannıñ aytqanlarına esaslanıp.
«Onı soyunmağa zorladılar, terrorizmde qabaatladılar, maneviy basqı yaptılar», – dep bildire faaller Redvan Caferovnıñ aytqanlarını.
Bundan soñ keçiş noqtasından Nuri Caverovnı acele yardım maşinasınen Ermeni Bazar hastahanesine alıp ketkenler, çünki o, yaramadı, dep qayd ete «Qırım birdemligi». Oğlu babasını maşinasınen taqip etti.
Advokat Edem Semedlâyevniñ aytqanına köre, Rusiye quvetçileri üç saat devamında «Nurige çeşit usullarnen maneviy basqı yaptı, aytqanı kibi».
«Keçiş noqtasına kelgende «Magnit» adlı mahsus tedbirler başlandı. Onı alıp ketkenler, eşyalarını baqqanlar, şeylerini alğanlar, yanında eki cep telefonı bar edi. Soñra basqı yapmağa başladılar, terrorist olğanında, İŞİDnen alâqaları bar olğanında qabaatladılar; Türkiyede olğan qız qardaşı aqqında, nenen oğraşqanını soramağa başladılar, Ukrainağa (esas – QA) ne içün ketkenini soradılar. Qoyanlarnı satın almağa ketkenini ayttı (qoyanlarnıñ fotoresimlerini bile kösterdi)», – dep tarif etti Semedlâyev.
İşğal etilgen Qırımnıñ müessiseleri, Nuri ve Redvan Caferovlar şimdilik bu malümatnı tasdıqlamay.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
