Fevralniñ 12-nde aqşam Sçastlivtsevo köy meclisiniñ azası 52 yaşında Artur İzmaylov vefat etti. Bu aqta Qırımtatar Milliy Meclisiniñ reisi Refat Çubarov bildirdi.
«Artur İzmaylov 1968 senesi Çirçik şeerinde dünyağa keldi, ana-babası Antey ağa ve Müsfere abla bala olğanda anda sürgün etilgen edi. 1980-lerniñ başında İzmaylovlar qorantası Özbekistandan Herson vilâyetiniñ Geniçesk rayonı Sçastlivtsevo köyüne, o yıllarda qırımtatarlarğa qapalı olğan tuvğan Qırımına yaqın köçti», – dep yazdı Çubarov Facebook saifesinde.
Meclis reisiniñ aytqanına köre, İzmaylov genç olğanda babasınıñ izinden ketip, qırımtatar milliy areketine qoşuldı. O, Sçastlivtsevo köy meclisiniñ reisi oldı, şimdiki meclis erkânına kirgen edi. Ömür arqadaşı Susannanen eki oğulları bar – 14 yaşında Edem ve 19 yaşında Ayder.
«Qırımtatar Milliy Meclisi ve şahsen menim adımdan Artur İzmaylovnıñ tuvğanları ve yaqınlarına – babası Antey ağa, apayı Susanna, oğulları Edem ve Ayder ve Herson vilâyeti Geniçesk cemamatına teren taziyelerimizni bildirem», – dep qoştı Refat Çubarov.
