Fevralniñ 6-nda Herson vilâyetiniñ Geniçesk rayonında, Qırımnıñ memuriy sıñırı yaqınlarında, Qırımda apiske alınğan qırımtatar faali Edem Bekirovğa qoltutuv aktsiyası olıp keçti. Toplaşqanlar işğal etilgen Qırım yolunda «Edem Bekirovğa azatlıq» yazuvlı şiarlarını açıp köterdi.
Qırım.Aqiqat mühbiriniñ bildirgenine köre, aktsiya iştirakçileri Edem Bekirovnı doğğan kününen hayırladı, çarşenbe künü o, 58 yaşını toldurdı.
«Çernobıl fondu» rayon cemaat teşkilâtınıñ reisi Viktor Zaharkin aktsiya teşkilâtçılarından biri olıp, Herson vilâyetinde Edem Bekirovğa qoltutuv aktsiyası beşinci kere ötkerile, dep bildirdi Qırım.Aqiqatqa. İştirakçiler Bekirov azat etilgenine qadar böyle aktsiyalarğa çıqmağa azır.
Fevralniñ 6-nda Kyivdeki matbuat konferentsiyasında Edem Bekirovnıñ qızı Eleonora babasınıñ hastalıqları ölümine sebep ola, dep qorqqanını aydınlattı. Onıñ aytqanına köre, Aqmescit SİZOsında Bekirovğa kerekli tibbiy yardım kösterilmey.
Daa evel Ukraina Yuqarı Radasınıñ insan aqları vekâletlisi Lüdmila Denisova Qırımda apiske alınğan qırımtatar faali Edem Bekirovnıñ sağlıq vaziyeti kritik, dep bildirgen edi.
Daa evel Bekirov ilk tahqiqat çerçivesinde belgilengen psihologik-psihiatrik ekspertizadan keçti, dep haber etilgen edi.
Qırımda tevqif etilgen qırımtatar faali Edem Bekirov «Qırım birdemligi» areketiniñ koordinatorlarından biri Server Mustafayev ile SİZOda aynı kamerada qala.
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Ukraina Tış işler nazirligi mahkemeniñ qararına qarşı «sert narazılıq» bildirdi.
Bekirovnıñ tuvğanları ayatı telükede olğanını bildirgen edi. Malüm ki, apiske alınğan faal şeker hastası ola. Ayağı kesilgen, muntazam sürette sarğılav yapılmalı.
Yanvarniñ 15-nde Bekirov Aqmescit SİZOsından Semaşko Cumhuriyet hastahanesiniñ endokrinologiya bölügine tibbiy teşkerüvge avuştırılğan edi. Yanvarniñ 18-nde Ukraina Yuqarı Radasınıñ insan aqları vekâletlisi Lüdmila Denisova Bekirov hastahaneden çıqarılıp, Aqmescit SİZOsınıñ mahsus blokuna yollanıldı, dep bildirdi.
