Ukrayına deñiz piyade askerleri platsdarm tutqan Herson vilâyetiniñ sol tarafında Krınki yaqınlarında uruşlar Ukrayına ve Rusiye cenkiniñ başçı büyük uruşlarında daa kiçik, amma Rusiye reberligi olarnı «pek problemli» dep saya, dep bildirdi Büyük Britaniyanıñ istihbaratı.
«Rusiye Dnipro özeniniñ ğarbiy yalısından bir yıl evelsi çekilip, Ukrayına quvetlerini özenden ğarpqa tutmağa, bu sektorda tınçlıq saqlamağa ve diger yerlerde Rusiye quvetlerini azat etmege tırıştı», – dep añlattı istihbarat.
Anda qaradaki uruşlar piyade askerlerniñ qarışıq çatışmaları ve qıyın ormanlarda toplarnıñ atışlarınen keçe.
«Ukrayına kiçik darbe uçucısızlarını semereli bir şekilde qullandı, Rusiye ava quvetleri ise Ukrayına ava mudafaa yetmegen yerlerge ateş ete», – dep aytıla haberde.
Ukrayına Silâlı quvetleri 2022 senesi oktâbr-noyabr aylarında Herson vilâyetiniñ sağ tarafını vilâyet merkezinen beraber azat etti. Vilâyetniñ sol tarafı işğal altında qala.
ISW bildirgenine köre, Ukrayına ordusı Herson vilâyetinde Dnipronıñ sol yalısında uruş areketlerini devam ettire. Talilciler Ukrayına Silâlı quvetleri Baş ştabınıñ esabatına esaslandı.
O künü Büyük Britaniya istihbaratı soñki aftada eñ intensiv qara uruşları üç yerde, hususan Ukrayına ordusı platsdarm qurğan Herson vilâyetiniñ Dnipro sol tarafında oldı, dep bildirdi.
Ukrayına Baş ştabı keçken afta bildirgenine köre, Mudafaa quvetleri Herson yönelişinde Dnipronıñ sol yalısında muvafaqiyetli areketler yaptı.
Ukrayına arbiyleriniñ malümatına köre, laf diversion, reyd ve istihbarat areketleri, Rusiye ordusınıñ silâ yolları, askerleri ve tehnika bulunğan yerlerini qıdıruv aqqında kete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
