Herson içün uruşlar vaqtında Ukraina silâlı quvetleriniñ maşinalarnen temin etilgen bölükleri maşina köpürini keri qaytarıldı. Bu aqta Ukraina mudafaa naziriniñ birinci muavini Anna Malâr Facebookta bildirdi.
«Cenüpte Herson rayonında uruşlar devam ete. Ukraina silâlı quvetleriniñ maşinalarnen temin etilgen bölükleri maşina köpürlerini keri qaytardı ve Dnipronıñ sol tarafında qaldı», – dep bildirdi o.
Ukraina silâlı quvetleriniñ baş komandanı Valeriy Zalujnıynıñ Facebookta bildirgenine köre, fevralniñ 25-nde saat 00:00-da (Qırımda 01:00-da) mudafaa quvetleriniñ Ukraina gruppirovkası cenüpte mudafaa operatsiyasını keçire.
«Herson şarqında mudafaa uruşları kete», – dep ayttı Zalujnıy.
Onıñ malümatına köre, Ukraina silâlı quvetleriniñ Arbiy-deñiz quvetleriniñ gruppirovkası Qara deñizniñ cenübiy-ğarbiy qısmında arbiy areketler keçirmege devam ete.
Bundan ğayrı, Ukraina arbiyleri Herson vilâyetindeki Nova Zburevka ve Yañı Kahovka meskün yerleri rayonlarında Rusiye ordusınıñ kolonnalarına darbe endirdi.
Ukraina prezidenti Volodımır Zelenskıy Herson civarlarında «qattı uruşlar» kete, dep tarif etti. Onıñ aytqanına köre, Rusiye işğal etilgen Qırımdan «basa».
Ukrainada Rusiye ücüm etken soñ arbiy vaziyet ilân etildi. Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti.
Herson vilâyeti devlet memuriyetiniñ matbuat hızmeti rayon devlet memuriyetiniñ malümatına esaslanıp bildirgenine köre, Rusiye ordusı fevralniñ 24-nde Herson vilâyetinde bir sıra meskün yerni, hususan Geniçesk, Oleşkini zapt etti.
Ukraina Devlet sıñır hızmeti Rusiye arbiy tehnikasınıñ Qırımdan esas Ukrainağa ketkeni ile video derc etti. Qırım şimalindeki Rusiye tehnikasınıñ foto ve videoları Reuters agentligi tarafından derc etildi.
Ukraina sağlıq nazirligi müessise yolbaşçısı Viktor Lâşkonıñ malümatına esaslanıp, fevralniñ 24-nde Rusiyeniñ Ukrainağa kerçekleştirgen ücümi neticesinde 57 ölü, 169 yaralı aqqında bildire.
Moskva Ukraina sıñırlarında tahminen 150 biñ arbiy ve tehnikanı toplağan soñ, Amerika istihbaratı Rusiyeniñ Ukrainağa ücüm etüv ihtimalı aqqında çoq tenbilegen edi. Kreml ücüm etecegini inkâr etken edi.
