Hersonda sıñırcılar işğal etilgen Qırımğa qapalı keçiş noqtalarından kirgen Rusiye vatandaşınıñ Ukrainağa kirişini üç yılğa yasaqladı.
«Rusiye vatandaşı Hersonğa İstanbul-Herson uçağınen keldi. Vesiqaları teşkerilgende arbiyler, 2019 senesi oktâbr ayında işğal etilgen Qırımnı qanunsız şekilde ziyaret etkenini bildi. Vaqtınca işğal etilgen Qırım Muhtar Cumhuriyetine kiriş-çıqış nizamını bozğanı içün sıñırcılar çetel vatandaşını Ukrainağa kirsetmedi ve kirişini üç yılğa yasaqladı», – dep aytıla haberde.
Ukraina sıñırcıları kirişi yasaqlanğan Rusiye vatandaşınıñ adı ve soyadını aydınlatmay. Onıñ da izaatları yoq.
Müessiseniñ matbuat hızmeti, keçken sene Ukraina sıñırcıları 1154 insannı çeşit sebeplerden kirsetmedi, dep bildirdi.
Qırım işğalinden soñ Ukraina yarımadanıñ bütün halqara keçiş noqtalarını qapattı. Qırımğa qanunğa köre kirmek içün Herson vilâyetiniñ memuriy sıñırındaki keçiş noqtalarını qullanmaq kerek. Bu qaideni bozğan insanlar sürgün etilecek ve para cezasını alacaq.
Ukraina Tış işler nazirligi 2016 senesi iyül ayında muracaat derc etip, çetel vatandaşlarını ve vatandaşlığı olmağan şahıslarnı qanunsız Qırım ziyaretleri aqqında tenbiledi.
Ukraina müessisesi, çetel siyasetçileriniñ Qırım ziyaretleri resmiy olamaz, dep qayd ete.
Çetel artistleri ve diger medeniyet erbapları Rusiye işğal etken Qırımğa Ukraina qapatqan keçiş noqtalarından kirip, Ukraina qanunlarını boza. Qırımğa gastrollerge kelgen ya da Qırımnıñ Rusiye işğaline qoltutqan bazı artist ve yırcılarğa esas Ukrainada çıqışta bulunmağa yasaq ettiler.
Yarımadanıñ Rusiye akimiyeti çetel vatandaşlarını Qırımğa davet etip, ilhaqını qanunlaştırmağa tırışa.
