Rusiye ordusınıñ aqşam üstü Hersonğa qarşı açqan ateşi neticesinde yedi insan elâk oldı. Bu aqta Herson vilâyeti arbiy memuriyetiniñ yolbaşçısı Yaroslav Yanuşeviç bildirdi. Onıñ malümatına köre, 21 insan yaralandı.
«Bugün – qaraman şeerimizniñ tarihında daa bir qorqunç saife. Tek bir aqşamda – 21 yaralanğan ve 7 kişi elâk olğan… Rusiye zaptçılarınıñ elinden ölgenler daima hatıramızda», – dep yazdı o.
Noyabrniñ 24-nden soñ Rusiye Hersonğa top ve raketalarnen ücüm etti. Ateş sebebinden çoq qatlı ev yanıp başladı, snarâdlarnıñ bir qısmı bala meydançığına tüşti.
Herson azat etilgen soñ Rusiye ordusı şeerge muntazam sürette ateş aça. Ukrayına akimiyeti Rusiye ordusından azat etilgen rayonlarnıñ sakinlerine vaqtınca Krıvıy Riğ ya da ğarbiy Ukrayınağa ketmege teklif etti. Bu işğalden azat etilgen topraqlarda qıştı yaşamaq qıyın olmasınen bağlıdır.
Kyiv vilâyetindeki Vışğorodda da mesken evge açılğan ateş neticesinde elâk olğanlarnıñ sayısı arttı. «Tünevinki ateşten soñ reanimatsiyada yedinci kişi elâk oldı. Elâk olğanlar hatıramızda», – dep bildirdi Kyiv vilâyetiniñ memuriyet yolbaşçısı Oleksiy Kuleba.
Ukrayınalı memur vilâyetniñ 70%-ı ışıqsız qala, dep tarif etti. O, sakinlerni Kyiv şeer memuriyeti açılışı aqqında ilân etken «yıqılmağan noqtalarını» qullanmağa çağırdı.
«Böyle obyektler esas hızmetlernen temin etilecek: elektrik, qızdıruv, suv, telefon bağı, «Starlinkler» vastasınn internet, ilk tibbiy yardım, ana ve bala odaları», – dep aytıla ilânda.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
